 |
 |
|
| Sulduz |
|
ايستيقلال ساواشي ياخيندادير
تاريخدن بلليدير کي، بوتؤو آذربايجان اون دوققوز يوزيلليکده باغلانميش گولوستان و تورکمنچاي موقاويله لري اساسيندا ايکي يئره پارچالانميشدير.
بو گون اونون قوزئيينده موستقيل دؤولتيميز قورولوب، گونئيي ايسه فارس ايشغالي آلتيندادير. دوخسان ايللييه باغلانميش هر ايکي موقاويله اؤز حوقوقي قوووه سيني ايتيرديگينه گؤره، آرتيق " اؤلو موقاويله " ساييلير. هر ايکي موقاويله يه ايمضاسيني قويان چار روسيياسي داغيليب، قاجارلار دؤولتي ايسه عؤمرونو باشا ووروب. اؤلو موقاويله لر اساسيندا گونئي آذربايجانين موستقيلليگيني تانيماماق بين الخالق حوقوق نورمالارينا دا اويغون بير مسله دئييل. تورپاغين صاحیبي اولان خالقين تاريخي موقاويله لره اؤز ايمضاسيني قويماماسي، هابئله موقاويله لرين مودتسيز بير زامان اوچون باغلانماماسي دا ديقتدن يايينا بيلمز. طبيعيدير کي، سون يوز ايلده همين تاريخي جينايته قارشي خالق عوصيانلارا آرا وئرمه ميشدير. گونئيلي-قوزئيلي وطنيميزده موستقيلليک قازانانا قدر ايستيقلال ساواشي نين داوام ائده جگي دانيلماز بير حقيقتدير. چاغداش گونلريميزده وطنيميزين گونئيينده ميللي حرکاتين يئنيدن قيزيشماسي دا سببسيز دئييل. غئيري-فارس خالقلارين ميللي حوقوق و حاقيني تانيمايان فارس رئژيمينه قارشي اعتيراض چيخيشلاري نين باش آليب گئتمه سي گونوموزون گئرچکليگيدير. چاغداش گونلريميزده گونئي آذربايجان خالقي نين سياسي-ميللي موباريزه سي چوخ دؤزولمز بير شراييطده آپاريلير. غدار، قانيچن بير رئژيمه قارشي اؤلوم-ديريم ساواشي آپاران خالق اؤز وارليغيني قوروماق اوچون قورتولوش يوللاري آرايير. ان اؤنمليسي اودور کي، ذکاسي اويانان خالق سياسي- ميللي مدنيتي نين ديرچلمه سي و يوکسلمه سي موناسيبتيله وار گوجونو قويماقدادير، ايستيقلال ساواشينا حاضيرليق آپارير، اؤز قارا طالعييني دوشونه رک دونيا ميقياسيندا گئدن آزادليق موجاديله لريني ايزله ييب تجروبه قازانير. خالقيميزي آلچالديب تهقير ائدن موللا ديکتاتوراسي اونون ميللي شوورونون فورمالاشيب کامالا چاتماماسي اوچون بوتون ايمکانلارا سون قويور. ميللي- معنوي ديرلري اؤلدورور، آنا ديلينده تحصيل آلماغا قاداغا قويور، بير خالق کيمي اونو ديرلنديرمير. اؤلکه ده فرقلي بير فيکير سؤيله ين ميللي دوشونجه لي شخصلر جزالانديريلير، سؤز آزادليغي يوخ درجه سينده دير، ميللي تورک آيدينلاريني بؤيوک جزالار گؤزله يير. مطبوعات و تئلئويزيياسي سربست اولماديغينا گؤره، اؤز صلاحيتلريني يئرينه يئتيره بيلمير. حاکيم فارس شووينيزمينه آزاجيق اعتيراض ائتمک اؤلومله نتيجله نير، چونکي ايراندا دار آغاجلاري دايم قورولودور. دونيادا گونئي آذربايجان خالقي کيمي ظولم و اسارتده قاليب ايشگنجه لرله دولو بير حيات سورن ايکينجي بير خالقا تسادوف ائتمک مومکون دئييل. بو اؤلکه ده تورکلرين سادت چيراغي قارانليقلار ايچريسينده سؤنموشدور.
بؤيوک بير خالقين بوتون تشببوس و چابالاري بئشيگيندجه بوغولور. سويداشلاريميز قول-نؤکر کيمي ايشله ديلير، اونلارين سياسي ايشلره قوشولوب موستقيل ري و تکليف سؤيله مه سي ايسه دينکله قارشيلانير. بوتؤو بير خالقين سياسي-ميللي دوشونجه سي اؤلگونلشديريلير، ميللي ماراقلاري، عقيده و مسله کي اؤزو ايله برابر دارا چکيلير. فعال خالق رئژيمين گؤزونون دوشمنيدير، قول-نؤکر ايطاعتکارليق و موطيعليگينه ايسه آيريجا اؤنم وئريلير. ايجتيماعي-سياسي فعالليغين قارشيسي اؤزل بير آمانسيزليقلا آلينير، کوتلوي اينامسيزليغا رواج ياراديلير. اؤز وطنينده اسير-گيروو کيمي ياشايان گونئيليلرين حاق موباريزه سينه بؤهتانلار آتيلير، اونلار ايرانا خيانت و جاسوسلوقدا سوچلانديريلير، اعتيراض سسيني قالديرانلاري آغير فسادلار گؤزله يير. آچيغيني دئيک کي، ايراندا اؤز حاقيني باشا دوشوب طلب ائدن خالقلارين عاقيبتي چوخ آغير و آجيناجاقليدير. خالقدان آيري دوشن دؤولت غئيري-فارس خالقلاري نين طالعيينه بيگانه و لاقئيددير، اونلارا ايکينجي نؤو اينسانلار کيمي باخير، حتّی يئري گلنده تورکلري بؤجکلره بنزه ديب آلچالدير. حاکيميت اؤلکه ده ميللي سيماسيزليق و دؤنوکلويه آيريجا مئيدان آچير، خالقيميزين روحونو بئله آشيلاياراق کوتلوي ايطاعتکارليغا زمين يارادير، ميللي عنعنه و ديرلريميز آشيلانيب آلچالديلير. قول-نؤکر اووقاتيني بئيينلره يئريده رک، موطيع بير خالق فورمالاشديرماغا چاليشير، ميللي دويغو و دوشونجه دن محروم قالان بير خالق ييغناغي يئتيشديرير. ميللي منليک و هئيسيتي اولمايان کيمسه لر کوتله سيني حاضيرلاماق موللا رئژيمي نين عالي مقصديدير. ائتنيک-ميللي مدنيتي گؤزدن ساليب اؤلگونلشديرمکله ميللي شوور و تفککوروموزو يوخ ائديب سارسيتماق اونون آپارديغي سيياستين ترکيب حيصه سيدير. بير ميلتي يئر اوزوندن سيليب آتماق اوچون اونون ائتنيک-مدني ديرلريني، تاريخي مدنيت و عادت-عنعنه سيني، هابئله آنا ديليني آشاغيلاييب نوفوذدان سالماق يئترلي ساييلا بيلر. بئله بير تخريباتچي موناسيبت خالقيميزين اؤزونو درک ائديب موعاصيرلشمه سينه ده انگللر آچير. ميللي وارليغيميزا قارشي چئوريلن بو آنتيبشري سيياست مدني-معنوي و تاريخي-سياسي باخيمدان اريگيب يوخا چيخماغيميزا، فارسلاشيب ميللي سيماميزي ايتيرمگيميزه مئيدان آچير. بؤيوک بير خالقين آنا ديلينده تحصيل آلماسينا ايمکان وئرمه مک، ديليني اؤلو ديلينه چئويرمک، ادبياتينا، اينجه سنتينه قاداغالار قويماق، اونو کوتلوي شکيلده فارسلاشديرماق ائتنو-مدني تئررور دئمکدير. معمارليق آبده لريني اوچوروب داغيتماق، ادبي-مدني اؤرنکلريني آشيلاماق وانداليزم سيياستيدير. گونئيليلرين قوزئيلي باجي-قارداشلاري ايله ايليشکيلريني زيفله ديب اونلاري تکله مک ايسه ميللي بيرليگيميزه قارشي دورماقدير. سؤز يوخ کي، سياسي-ميللي آزادليغي اؤز الينده اولمايان خالقين سياسي-ميللي مدنيت و يئتکينليگي ده گرگينجه کامالا چاتماز. بونون دا ايلکين گوناهلاري شوبهه سيز کي، فارس ديکتاتوراسيدير. چونکي بو حاکيميت تورکلري منن ايفليج وضعيتينه سالميش، بوتون ماددي و معنوي ثروتلريني اليندن آلميشدير. خالقيميزا دوشمن گؤزو ايله باخان رئژيم اونون دوستو يوخ، ان بؤيوک رقيبي و بدخاهيدير. گونئيلي تورکلرين آجي طالعييندن دانيشماق چوخ آزدير، يئترلي دئييل، ميللي ايستيقلال ساواشينا کوتلوي شکيلده قوشولوب آياغا دورماق، فداکارليق گؤسترمک، ميللي ناموسوموز اوغروندا دؤنمه دن موباريزه آپارماق داها مقصدويغوندور. بونون اوچون فارس رئژيمينه اويوب ميللي ظولم و اسارته دؤزمک، سئيرچي و موشاهيده چي مؤوقئعيينده دورماق، ميللي سادت يئرينه اؤز فردي خوشبختليگيني دوشونمک ميللي سيماسيزليقدير. اؤز گله جگينه اينام بسلمه ييب اوميدسيزلييه قاپيلان خالق آزادليغا چيخيب ايستيقلال قازانا بيلمز. " ايران ائله تورکلريندير " ، " ايراندا حاکيميتده ائله تورکلردير " کيمي بوش، معناسيز چاغيريشلار تورکلري ميللي ساواشدان چکينديرمک اوچوندور، اونلاري آلداديب اساس مقصددن يايينديرماغا خيدمت گؤسترير. ايران حاکيميتينده وظيفه توتماق اساس شرط دئييل، وظيفه صاحیبي نين ميللي مسلک و عقيدهسي، اؤز خالقينا موناسيبت و قايغيسي داها چوخ اؤنمليدير. هامييا بلليدير کي، رئژيم تپه دن-ديرناغا قدر فارسلاشمايان بير کيمسه ني حاکيميته گتيرمير. ساتقين، دؤنوک اولمايان غئيري-فارسلارا وظيفه تاپشيريلمير، اؤز خالقينا آزاجيق رغبت بسله ين بير تورکون ايره لي چکيلمه سي گؤرونمه ميش بير ايشدير. چوخ واخت دا دوشمن تبليغاتينا اوياراق، اؤز ميللي ماراقلاريميزي دوشونموروک، ميللي يؤنده صؤحبت و دارتيشمالاردان دا قورخوب قاچيريق، آچيق-ساچيق و خالقين باشا دوشه جگي بير ديلده دانيشميريق و بئله ليکله ده ميللي فاجيعه ميزين ميسکين بير تاماشاچاسينا چئوريليريک. نفسي-امماره اسيري اولوب ظولمه دؤزمک ميللي هئيسيتسيزليک و معنوي دوشکونلوکدور. بو گون گونئييميزين وارلي-دؤولتلي سرمايدارلاردان داها چوخ منن و فيکرن زنگين آيدينلارا احتيياجي وار. ازيلن خالقين چيخيش يولو اونون ميللي اويانيشي، ميللي بيرليگي و فعالليغي ايله باغليدير. گونئيلي-قوزئيلي سياسي-معنوي کؤرپولري يئنيدن قوروب برپا ائتمک ميللي بوتؤولويه آپاران عاميللردير. آلتميش ميليون خالقين اوچرنگلي بايراغيميز آلتيندا سيخ بيرلشه رک واحيد بير ايدئالا خيدمت گؤسترمه سي گونوموزون عومده طلبيدير، ايستيقلال ساواشي نين معنا و ماهيتيني دوزگون باشا دوشوب آنلاماسي ايسه ميللي کاميلليگي نين اساس گؤستريجيسيدير. بوندان باشقا، بوتون قوروم و بيرليکلرين ميللي ايدئولوگييا اساسيندا فورمالاشيب فعاليت گؤسترمه سي ده ميللي ايستيقلال ساواشينا حاضيرليغين ايلکين علامتيدير. متين بير ايراده اورتايا قويماييب سئمينار و درنکچيليکله، سوروشکن کونقرئسلرله باش قاتماق ميللي حرکاتا خيدمت نومونه سي ساييلا بيلمز. خالقي ايدئولوژي باخيمدان يوکسک بير ميللي و سياسي ساييقليقلا گله جگه سسله مک، تربييه ائديب اينقيلابا حاضيرلاماق هاميميزين موقدس بورجوموزدور. ايستيقلال ساواشي ايلک اؤنجه خالقين دؤيوشکن ميللي روحونون ايفاده سي و تصديقيدير و بو ساواش اونون آيدين دويغو و دوشونجه لريندن دوغوب ووسعت آلاجاق. سياسي-ايدئولوژي باخيشلاري کامالا چاتمايان خالق اوغور قازانا بيلمز، جهالت و گئريليک باتاقليغيندا باتيب قالار. بونون اوچون ده اؤلکه بويو ميللي تبليغات و تشويقات ايشي نين آپاريلماسي بير ضرورت کيمي قارشيدا دورور. غدار، زاليم بير دؤولتي سوست، بيگانه بير خالق دئييل، جسور، قورخماز و دؤنمز بير خالق دئويره بيلر. ميللي ناموس و غئيرتي اولان بير خالقين قول- کؤله حياتينا دؤزوب قاتلاشماسي آغلاسيغمازدير. آنجاق بو دا وار کي، خالق کورتبيي شکيلده اؤز حاقيني قورويا بيلمز، اونو قفلت يوخوسوندان اوياديب ايره ليگه آپاران، گؤزونو آچان، روحونا تاثير ائتمگي باجاران ساغلام ميلتچي آيدينلار گرکدير. حرکت و فعاليته سسله ين قوووه لر اؤنده گئتمکله خالق ايله بيرگه آدديملامالي، اؤز اؤنجول رولونو اويناماغي باجارماليدير. بو شرفلي تاريخي وظيفه هاميدان اؤنجه اوزاقگؤرن، ديانتلي قوروم و بيرليکلرين اوزرينه دوشور. اونلارين آيدين بير پروقرام و ستراتئگيياسي اولمالي، جمعيتي سياسي- معنوي باخيمدان ايستيقلال ساواشينا حاضيرلاماليدير. قلبه نين گئرچکلشمه سي قوروم و بيرليکلرين بيرگه ايش فعاليتيندن آسيلي اولاجاق. بو گون گونئي آذربايجاندا بئله قوروم و بيرليکلر وارمي؟ شوبهه سيز کي، وار! آنجاق اونلارين علاقه و ايليشکيلري گرگينجه دئييل. تشکيلاتلانما لعنگ گئدير، کوتلوي فعالليغا آز اؤنم وئريلير، چتينليک و مانعه لر ايجتيماعيتين گوجو ايله آرادان قالديريلير. خالق آراسيندا پاسسيوليک هله چوخدور، خالقين قورتولماسينا اينام يئترلي دئييل، ميللي تبليغات بوتون گوجو ايله اؤزونو گؤستره بيلمير. آنجاق بونا باخماياراق، فعاليتسيز کوتله آرتيق حرکته گلمکده دير، ان فرحلي حال اودور کي، بدبينليک، روح دوشکونلوگو يوخدور. هر ايل بزز قالاسينا ميليونلارلا اينسانلارين آخيشماسي دا ائله ايستيقلال عشقي و مفکوره سي نين قلبه سي دئمکدير. اويانان خالقين گوج قايناغي - اونون ميللي موجاديله ده موتشککيل بير ايراده اورتايا قويماسيندادير. سايجا آز اولان قوروم و بيرليکلر بيرلشه رک، واحيد بير خالق آخينينا چئوريلمکده دير، کيچيک خالق اعتيراض يوروشلري گئج-تئز عومومخالق حرکاتي ايله عوض اولوناجاق، خالق عاميلي سياسي- ميللي بير عاميل کيمي گئرچکلشه جک. البتته کي، جمعيتين فعالليغيني آرتيراراق موباريزليک اووقاتيني يوکسلتمکله بؤيوک اوغورلار قازانيلاجاق. قودوزلاشميش رئژيمين گوجو ده، اونون سياسي يؤنومو ده آرتيق بوتون دونيايا بلليدير. حاضيردا اونو قورويوب-ساخلاماقدان اؤترو نووه پروقرامي دا يئترلي دئييل. چونکي نارازي، غضبلي و موباريز خالق عاميلي هر نؤو سيلاهدان گوجلودور. فارس ايله ائرمنييه آرخالانان دؤولتين داياقلاري چورويوب چؤکمکده دير. " موسلمان قارداشليغي " نا خيانت ائدن حاکيميتين ائرمنيستانا موحاريبه ده يارديم گؤستريب اونو ايقتيصادي بلوکادادان چيخارماسي موسلمان دونياسيندا هئچ زامان ياددان چيخماياجاق. ديني- ايدئولوژي جهتدن نوفوذونو ايتيرن ايرانين باشقا خالقلارا تاثيري قالماميش، اونون يئريني رئژيمه قارشي درين بير نيفرت توتموشدور. ارک قالاسيني اوچوران، قارا کيلسه ني ايسه گؤز ببگي کيمي قورويان بير دؤولتين ايسلامي-تورک آبيده لرينه موناسيبتي ده چوخ حقيقتلري اوزه چيخارير. بئش-اون ائرمنييه مکتب آچيب آنا ديلينده اوخوماسينا شراييط يارادان، آنجاق تورکلرين اؤز ديلينده تحصيل آلماسيني ياساقلايان دؤولتين موسلمان تسسوبکئشليگي اينانديريجي دئييل. آردی وار |
|
+ نوشته شده در
جمعه نوزدهم مرداد 1386ساعت 21:11 توسط Haray |
|
|
صفحه نخست پست الکترونیک آرشیو وبلاگ عناوین مطالب وبلاگ |
| درباره وبلاگ |
Azerbaycan
Sulduz ((milat fadaeilari)) |
| نوشته های پیشین |
|
هفته سوم مرداد 1386 هفته دوم مرداد 1386 هفته اوّل مرداد 1386 هفته چهارم تیر 1386 هفته سوم تیر 1386 هفته دوم تیر 1386 هفته اوّل تیر 1386 هفته چهارم خرداد 1386 هفته سوم خرداد 1386 |
| پیوندها |
|
Baybak sayti Tumrus sayti |
|
RSS
|